韓國男團BIGBANG於7月時來港舉行四場見面會，上周於澳門威尼斯人舉行澳門場，今日佢哋已飛到去台灣準備開騷。

BIGBANG由今日開始，連續3日於台灣舉辦見面會，成員今早11時38分左右抵達桃園機場，主辦方一早準備好車輛於VIP閘口等候，不過只得太陽、G-DRAGON（GD）及大成現身，3人落機後都戴上口罩並低頭快步上車離開，當中GD更係一直頭耷耷，似乎好攰咁。

另外，韓國13人男團Seventeen星期日時於香港舉行見面會，今日佢哋又一樣飛去台灣，準備後日於台灣舉辦兩場見面會。Seventeen今日中午抵台時，獲300粉絲接機，引起一陣騷動。

而GD前日於直播節目中，搵嚟算命專家分析佢今年及明年運勢，專家指GD明年運勢大致唔錯，不過5月時要注意健康，6月會有爛桃花，9月時要特別小心「李姓人士」，GD聽完後立即聯想到隊友勝利。