成龍月中喺博鰲亞洲論壇上發表奴才論，話「中國人是需要管的」引發軒然大波，抵制聲不絕，佢班圈中死黨好似譚詠麟、曾志偉唔敢出面撐，只係幫佢求饒，反而成龍就唔回應，只係話記者斷章取義。
件事擾攘咗十幾日，成龍終於肯回應，接受內地嘅鳳凰衛視節目《娛樂大風暴》訪問，條片噚日擺咗上網。日前廣電總局先至話有醜聞嘅名人唔出得鏡，名人嘅醜聞唔講得，但試過背妻偷播龍種嘅成龍，搞出呢單奴才論，兩樣都中晒喎，唔通雙重標準？

忙招呼Fans

片段中成龍好似「動L」上身，動作多多，一開始就講：「清者自清。」可能太緊張，之後「動L」彈咗句「明者」，要旁人提示係「濁者自濁」，佢先講到落去，仲話：「我做任何事情都是沒有目的，只是出自一個心──愛港、愛台、愛中國、愛澳門，因為我們都是中國人，所以不好的我也要去講。最近他們叫我出來解釋，我覺得這件事情根本不值得我談，有解釋的時間我還不如去幫人，做慈善，解釋是不必要的，這樣做反而會中了他們的計，所以我根本理都不理。」
詭辯一輪，成龍接住又話自己好忙好忙：「我現在要忙的事是做慈善、世博會、為五一大滙演作準備，我還要招待全世界的影迷，為他們安排一些節目……」聽講因為佢口不擇言，嚇走一班米飯班主，冇人敢搵佢拍廣告。睇嚟成龍一日唔道歉，一日都有好多時間招待全世界fans喎。