車路士希望同首席門將泰拔高圖爾斯提早續約，似乎唔多順利，據講呢位比利時門將唔知係咪不愁出路，希望將目前嘅9萬鎊周薪（約90萬港元）加到20萬鎊（約200萬港元），加薪幅度超過100%，嚇到車路士要暫時唔傾住，諗諗計再算。

高圖爾斯而家同車路士合約到2019年屆滿，不過一直盛傳西甲豪門皇家馬德里斟唔到迪基亞之後，將目標轉移向佢身上，所以車路士球會希望早啲續長約安心啲，不過高圖爾斯叫價咁狠，都幾難有進展。

另外，剛以破利物浦球會轉會費紀錄3,900萬鎊，由羅馬轉投紅軍嘅穆罕默德沙拿，由於當年車路士將佢以1,600萬鎊賣畀羅馬嘅時候有特別條款，沙拿再轉會嘅時候，羅馬收得轉會費嘅淨賺差額，有10%要畀返車路士，即係車仔都叫無端端有多230萬鎊（約2,300萬港元）收入。