英資洋行太古06年年報透露，舊年有3位董事年薪過千萬，分別係主席白紀圖嘅1169.3萬、財務總監郭鵬嘅1074.7萬，同負責地產業務嘅簡基富（1176.4萬）。睇落主席人工好似仲少啲，之不過佢做主席都只係舊年2月嘅事，若果成年咁計，人工應該高過簡生。至於另一名董事，陳南祿雖然無喺太古出糧，但佢喺國泰分糧就一的都唔輸蝕，舊年人工都有1016萬元，亦晉身千萬元打工皇帝。
太古旗下港機工程打骰嘅副主席陳炳傑舊年人工731.1萬，未能同佢哋睇齊。但係咪代表港機盈利能力唔及太古同國泰，咁又未必，呢隻基金愛股噚日收市價已去到124.3蚊，反而太古同國泰則分別報93.55蚊同20.75蚊，似乎投資者仍十分睇好港機未來發展，假以時日，傑哥人工去到南記級數都唔出奇。