香港搞政改,泰國部份曼谷市民上街要求政改,不要誤會上街示威工人一定係爭取民主嘅,呢次曼谷人就唔係,佢地係要求取消民主選舉,不要一人一票,改由各階層、各界別選代表出嚟成立一個「人民議會」People'sCouncil,由呢個議會選總理,雖然倡議者如索帖未有詳細說明細則,但我地香港人一睇就知道係想搞功能組別,提名委員會、選舉委員會之類。左丁山對泰國R講:「你地不如叫索帖嚟香港見一見中聯辦,學習香港特區基本法,點樣成立選舉委員會啦。」泰國R唯有苦笑,不過佢話泰王壽辰日過後,在星期五(十二月六日)政府與反對派會展開談判,到咗周末或有希望打破僵局。
我地香港人費盡九牛二虎之力都冇法子消除功能組別議席,想唔到泰國民主黨及曼谷中產專業精英就想向香港基本法學師,實在好諷刺。不止此也,總理英祿嘅「為泰黨」控制嘅眾議院已通過憲法修訂案,將參議院全部議席由半委任(由法官及高級公僕提名委任)半直選制,改為全部直選制,呢條議案連參議院都通過埋,但素來保皇嘅憲法法庭竟然裁定修訂案違反少數人(rightsoftheminority)的權利,不能成為法律。他日香港如真的撤銷功能組別,不知會否引發類似嘅司法覆核?
如果站在支持民主直選立場,本港輿論唔應該支持泰國民主黨及索帖,民主黨自1992年泰國有民主直選以來,每選必敗,原因係曼谷人選票不及泰國東北省地區人民咁多選票,因此曼谷精英非常谷住道氣。「國際紐約時報」(NYT)記者訪問一位43歲曼谷女士,呢位參加示威嘅女士講:「我地知道甚麼是對,甚麼是錯,我地係中產,受過良好教育,識得嘢,窮人就不分好歹,將選票賣俾有錢人!」呢番說話如出自中環女性專業人士之口,恐怕會引起軒然大波,俾人罵到想死,但曼谷精英顯然贊同呢種想法,認為自己叻過東北地區嘅農民,泰國應由曼谷精英管治。呢種想法,與胡應湘以前講過納稅人投票時應有兩票,大同小異。