應采兒與舊愛孫耀威前晚與傅明憲及名模樂基兒、琦琦、LisaS.和AnaR.等，出席時裝名店H&M新店開幕活動，應采兒與孫耀威緣慳一面，她笑說：「我好大方，會同佢打招呼，再見亦是朋友，好耐冇見過。」應采兒透露男友陳小春現於珠海拍戲，加上她即將會與古天樂開戲，故此相聚時間十分少，問她會否怕小春偷食？她笑說：「要搵就一定搵後生同靚過我，唔係打死佢！我會畀番綠帽佢戴，我哋公開咗，咁落我面，一定要報仇，會落佢降頭，等佢孤獨老死。」
另外，對於日前o靚模Angelababy和Kama「有你冇我」的是非，作為大師姐的琦琦表示：「開唔開心都要做，不如一齊開心啲做嘢。」記者表示o靚模爭嘢做，琦琦說：「以前咪仲犀利，佢哋做模特兒好幸福，因為內地好開放，有好多機會，佢哋應該去教堂感恩，聽吓禱告，唔會咁多是非。」

樂基兒瘋狂血拼

此外，樂基兒與好友LisaS.及AnaR.入場購物，當中樂基兒顯得最瘋狂，兩手揀滿衣物，問她會否為男友黎明買衫？她說：「見到啱都會，不過有時買得大得滯，有時又太細。」問她會否為男友買內褲？她說：「唔會，自己買內衣褲都驚俾人影，都係上網買。」
採訪：羅慧敏
攝影：陳順禎、娛樂突發組