華華聞說,港聯股東其實心灰意冷想唔玩,但作為香港航空公司,香港政府唔准佢將控制性股權賣畀人,賭王外甥兼港聯惟有盡賣45%,攞番些少本,好過執咗佢血本無歸。
更早之前,本港另一間廉價航空公司中富航空,亦都將45%股權賣畀海航集團。據講,海航打算收起港聯同中富,壯大規模注入一間叫做新華嘅航空集團,第日上市集資。但係成件事嘅透明度其實幾低,市場完全唔知呢幾間航空公司想點,究竟有乜生意上嘅發展大計。
港聯行政總裁謝天賜噚晚同華華講,希望引入海航集團之後,能夠加強港聯喺內地嘅銷售渠道,令多啲內地同胞買到港聯嘅機票,盡快收支平衡。不過,𠵱家每桶飛機油貴到成90幾美元(飛機油貴過國際油價20美元),華華真係要講句:Godblessyou。
李華華