香港大學醫學院成立已經130周年，今晚係灣仔會展搞咗個大型晚宴，超過3,500人出席，全場座無虛席，名醫雲集，星光熠熠，連朝早搞完第三次集思會嘅特首林鄭都有嚟主禮切餅，全國政協副主席梁振英都係座上客。林鄭致辭時除咗祝賀醫學院外，亦乘機大sell政策，話會就醫管局撥款作出改變，又話會增加資源改善公立醫院擠迫問題喎。

晚宴上有好多精彩節目，當中包括由超過50位醫學生主演嘅音樂劇，依套音樂劇絕對唔少嘢，因為係著名音樂人趙增熹親自監製，透過好多經典流行金曲，唱出醫學院130年以來嘅成就，結尾仲大合唱佢為醫學院130周年特別創作嘅《杏林遍地》。

港大醫學院院長梁卓偉致謝辭時就話，醫學院會繼續在教學、科研、臨床服務上繼續努力，搏盡無悔，止於至善，繼續孕育更多有仁心、有承擔嘅醫護人員，為本地以至全球人民服務，改善大眾健康。