當年今日

馮仁昭四圍超:城城離家出走要六星級享受

蘋果日報 2002/01/07 00:00


早排有個friend同馮仁昭講,話郭富城今個月book咗灣仔君悅嘅房幾日,馮仁昭初頭都唔為意,點知記者連續兩晚都見郭富城喺君悅出現。大前晚豐裕興業主席龐維仁喺君悅補擺喜酒,而前晚港姐前亞軍潘芝莉亦喺君悅擺結婚酒,兩晚都咁啱俾記者撞到城城。

唔答去邊
記者大前晚見到城城離開君悅,於是問佢去邊,城城當時冇答,而佢旁邊嘅助手就話城城好忙,要趕住走。
如果城城有屋都唔住,走去君悅book間房,真係幾奇怪喎!

發哥無端變「籠中鳥」
台灣有報道話周潤發早排喺上海拍廣告時,有工作人員話發嫂事事對發哥管束,又話發哥私下曾向服務員發牢騷指自己係「籠中鳥」。以馮仁昭熟識嘅發哥,冇乜可能會同啲陌生人講內心話,噚日打電話畀佢兩公婆,佢哋對呢啲花邊新聞一笑置之,發哥話對呢啲虛構嘅報道真係睬佢都嘥氣。
王菲、霆鋒濃情不復再
王菲同謝霆鋒成日俾人傳分咗手,又話鄭秀文係第三者,每次霆鋒反應都好大,因為王菲對呢啲緋聞都幾介意。馮仁昭聽啲知情者講,話王菲都同霆鋒三分三合,感情確係淡咗好多,今次阿菲喺上海拍《天下無雙》,霆鋒都冇去過上海探班,以前佢哋最濃情嗰陣,阿菲去到邊度做嘢,兩個人都會爭取見面,𠵱家就好少囉!

尹子維歎茶有女伴
馮仁昭上星期五,見到尹子維同一個女仔喺銅鑼灣嘅Anytime餐廳飲嘢,兩個人全程以英文交談,尹子維以頭巾包頭,而個女仔就一身黑色打扮。尹子維不停煲煙,佢除咗飲齋啡,重食咗個蛋布甸,兩個人傾咗成個幾鐘,先至施施然離開。

何麗全寧睇GiGi不理柏芝
張柏芝為仁濟籌款受傷,佢經理人向華強夫婦聲言要向無綫追究責任,身為無綫助理製作總監嘅何麗全)前日話會向柏芝嘅家人同經理人道歉,但係直至噚晚為止,都未見佢去醫院探過柏芝,反而前晚走咗去紅館睇梁詠琪演唱會,唔知佢打咗電話畀柏芝未呢!