台灣嘅經濟都算好發達，但嗰日同台灣都有業務嘅包浩斯主席黃銳林傾過偈，華華先知台灣商人好鬼迷信。
話說上個禮拜五，包浩斯公布中期業績，旗下台灣業務收入逆市升到嘭嘭聲，短短6個月，18間舖營業額增近6成，同店銷售增長兩成七，高過本港7個巴仙增長多多聲，更加令同類嘅大型連鎖服裝店，如堡獅龍同佐丹奴望塵莫及。堡獅龍台灣同店銷售跌咗一成半；佐丹奴台灣營業額跌咗17.6個巴仙，唔眼紅包浩斯至怪。
近期台灣日夜倒扁，搞到七國咁亂，賣水賣小食嘅老闆就話，靠住倒扁挺扁班愛國分子，先至賺到盤滿缽滿啫！咁黃生有咩妙計，令到上年度仲蝕緊嘅台灣業務賺大錢咁巴閉呢？
黃生話，台灣人、特別係做生意嘅，都迷信到不得了，思想古老守舊嘅程度，簡直可以追溯至浸豬籠年代。做生意難免有淡旺時節，當生意冇咁好嗰日，無論台灣大、中、定係小型商場，班主管就嗱嗱聲，準備好元寶蠟燭、金銀衣紙去商場外拜神作法，希望生意蒸蒸日上。
唔知係咪其他老細拜極神都冇神庇佑，眼見包浩斯賺咁多，點都會同啲古怪嘢有關嘅，就離譜到問黃生係咪因為「養鬼仔」，所以連神都唔使拜就撈到風生水起。

黃生就梗係冇呢班「文明」嘅台灣人咁好氣，聽完都係得啖笑，笑笑口同華華講，台灣咁掂，都係因為採用咗球場必殺技嘅「人盯人」政策。有別於其他台灣零售商一直都採取「稻草人」式銷售策略，即係客人入到間舖，揀、搵、試，一律客人自己搞掂，睇啱就埋收銀處畀錢，sales只係肩負看守角色，昅實有冇人搗亂㗎咋！
相反，黃生就將劉華嘅說話銘記於心，個個sales喺「三文治」式管理下，畀上層營運經理同下層前線經理訓練成超班馬，先作推薦後有銷售，符合「推銷」之道，咁就梗係突圍而出啦！睇嚟，其他公司可以慳番啲元寶蠟燭錢，轉移資源去培訓員工，應該有望扭虧為盈。
[email protected]