歐陽妙芝、鄧鉅明夫婦，仲有一班高官、局長，噚晚喺灣仔出席「香港愛滋基金會慈善晚宴」，周慧敏以關愛大使身份現身，不過就拒絕接受訪問。

歐陽妙芝啱啱做完音樂劇《尋找快樂時代》，佢話同所有工作人員都好夾，所以做完個劇之後都仲有keep住聯絡，噚晚個晚宴就可以聚一聚。而呢個音樂劇喺下年3月尾會再公演，佢話雖然未了解做戲係咩一回事，但識咗一班歌手拍檔之後覺得好啱key，妙芝話：「佢哋搞到我好想學音樂，o依家跟盧巧音老公Sammy學結他，彈到幾句，學緊彈台灣歌手周興哲嘅《你，好不好?》。我細個學過琵琶兩年，學到怕咗，因為俾屋企人逼去學，完全唔享受，不過今次個劇見佢哋彈得好開心。無意中聽到周興哲嘅歌，唔知有冇機會識到呢位台灣小鮮肉歌手呢?佢係我第一個留意嘅台灣男仔，o依家成日上網睇佢嘅片。」

歐陽妙芝話細細個就同劉德華拍MV，8歲鍾意過陳百強，對呢類型嘅男士有傾慕之情，妙芝笑話以前成日幻想會有呢類型嘅男士唱歌彈琴佢聽。