轆Book:Fiat500 POP一聲瘦身
年中先Cute爆登場、贏盡唔少寵愛嘅Fiat500,話咁快又話換新Look,本來就以身形小巧見稱嘅佢,竟然仲要玩瘦身!左減右減,賣相更見簡約,為咗乜?咁就梗係想加多幾錢肉緊討你歡心啦!咁嘅時勢,慳得就慳,減磅瘦身,價錢又可以平多少少,Fans們肯定又心動多少少。
記者:黎頌詩
攝影:陳陶鈞
Model:Joanne
雖則係玩瘦身,不過唔使擔心Fiat500POP會無晒睇頭,作為撒手鐧嘅可愛風格完全不變,再睇真啲,又果然係減咗磅。車頭鬼面罩上一條電鍍Bar首先成為減磅目標,Cute樣依舊,不過就更見亁淨簡約。車身一樣夠利落,原本車側一條有電鍍500標誌嘅裝飾線條一樣無得留低。POP版亦放棄咗鋁合金胎軨,轉用軨冚,不過個人覺得,比起Lounge版嘅多輻式跑味胎軨,現在嘅軨冚造型似乎更懷舊更可愛。令人覺得若有所失嘅係兩邊側鏡沒有用電鍍,轉成跟車身同色,似乎失去了一點古典味。瘦咗身嘅500亦都密實咗,因為唔開天窗啦!當然天窗呢項設備究竟會唔會令部車有分加?其實都好睇個人喜好。睇埋內櫳,放心晒,至冧賣相一樣Keep到。俏皮雙色座椅、卡通Feel嘅圓碌碌頭枕,仲有嗰個令人想起MINI嘅巨型圓錶板,全部都搵得到。
■車身一片光滑,原本側面有「500」字樣嘅裝飾線條不見了。
瘦身只係搞個Look?錯!只係內櫳嘅改動唔畀你一眼睇穿啫,被省減嘅,大部份係內置設備;藍芽裝置、iPod接頭同恒溫冷氣,係咁多。咦,睇落軚環都「亁淨」咗!原來除咗唔用真皮之外,軚環上亦沒有了音響調校按鈕。好,同大家交代完500嘅「瘦身報告」,又要睇睇纖巧咗嘅佢有無影響「體能」。其實坊間賣可愛但性格火辣嘅車當然有,不過睇500嘅規格,100匹,加埋扭力131Nm,心諗,又係溫柔車仔格。實在估唔到,我試嘅呢架自動波,同揸過嘅各品牌車仔都好唔同,竟然好有粗豪棍波感!軚環同油門嘅反應都明顯好「到」,有別於一般加速反應稍慢嘅自動波箱,偏硬嘅避震更加令跑格現形,即使係自動波,駕駛嘅趣味感都相當突出。不可不提係,試車當日,車上坐住身為死硬派棍波支持者嘅攝影師哥哥,佢沿途意見多多,猛話好有Feel,然後,打聽價錢。問佢點解竟然想轉軚,佢大條道理:「女朋友揸得到,我又可以過棍波癮。」有Point!似乎,Fiat500嘅真正吸引力,並唔係局限喺外表。
■話明係簡約瘦身版,Pop版嘅車頭省略了原本Lounge版鬼面罩上嘅電鍍橫條。
■內櫳風格佈局不變,不過設備上就一樣有「瘦身」行動。
引擎:1,368cc直4DOHC
馬力:100bhp/6,000rpm
扭力:131Nm/4,250rpm
傳動:5前速半自動波/6前速手波
查詢:AutoSportiva(28778788)