現年29歲嘅林師傑，喺09年參加第一屆大台嘅音樂真人騷《超級巨聲》而入行，父母都做過大台藝人，傳聞中林媽媽更同大台高層珍姐曾勵珍非常之熟，喺《超級巨聲》完咗之後同許廷鏗、劉威煌、陳鴻碩等同期參賽者組成「Super 4」，唱過《刑警》及《三國》主題曲等。

12年起參演處景劇《愛‧回家》，本來角色喺劇中屬閒中之閒嘅閒角，但係意外地受觀眾歡迎，成功入屋，角色「木偶哥」戲份越嚟越多，不過自從15年做完《愛‧回家》之後，直到現時都只係客串咗兩套劇集，而喺音樂方面，六首個人作品佢都係作曲者，不過全部都係《愛‧回家》嘅插曲，到現時都未出過個人專輯。

感情方面，啱啱出道冇耐林師傑已經同大佢兩歲嘅鄧穎芝拍拖，不過戀情只係維持咗兩年，有指因鄧穎芝撞破林師傑同第三者車震而分手收場（新聞連結： http://bit.ly/2Ep0c5h ）。分手後，林師傑傳過唔少緋聞，當中就有Super Girls嘅吳嘉熙、同期嘅何雁詩、合作過嘅湯洛雯等，不過芸芸緋聞當中只有一個真命天女，就係現年25歲嘅13年友誼小姐歐陽巧瑩（Tammy），15年仲被人影到兩個人一齊上酒店（新聞連結： http://bit.ly/2CsJNft ），兩人戀情公開後更不時喺活動上晒恩愛。

而噚日木偶哥宣布同Tammy嘅喜訊後，今日佢哋齊齊回覆傳媒，一人一句輪住報喜，Tammy表示：「多謝大家關心同祝福，啱啱收工就收到好多炸我嘅WhatsApp，都開心嘅，o依家咁，我哋呢個計劃籌備當中，未正式開始。」木偶哥話：「因為之前都好忙要拍節目，出咗埠。」Tammy就話：「我又要拍劇，啲時間大家都唔係好啱。」

木偶哥又表示：「所以籌備當中，只係初步籌備，首先多謝兩邊屋企人支持我哋做呢個決定，我哋都心思熟慮咗一陣，多謝Hermen一番說話令我有信心同動力做呢個決定，好多謝老闆喺年尾送呢份咁好禮物同回憶畀我哋。」Tammy補充：「仲有幫我哋擇埋日，令我哋有啲方向，因為我哋一開始完全冇方向，我哋冇當呢件事係乜，兩個人一齊最緊要開心，大家都有成長，呢三年大家成長好多，見新聞Hermen讚我好女仔，其實師傑都係好男仔，呢3年佢令到我成長好多，我好有信心，呢個男人係付託終生對象，多謝大家祝福，大家都開開心心幸幸福福。

問到男友有冇跪地求婚？Tammy冧爆讚木偶哥係靈魂伴侶：「我哋好平淡，因為佢知我唔中意驚喜，所以早幾個月就帶我去買求婚戒指，好可愛。擺咗喺屋企當眼處好耐，成日叫我去睇。直到有一日 好似大概上個月左右，我哋夜晚傾偈，回憶呢三年嚟大家一齊經歷咗好多，進步咗好多，亦都喺對方身上學到好多嘢，發現我哋除咗係情侶關係，更加係靈魂伴侶，覺得係時候喇，佢就擺咗戒指喺屋企梳化度，成件事好舒服，多謝佢送咗自己畀我。」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent