員工嘅薪酬係唔少企業嘅最高機密，但喺職場上，打工仔偏偏最關心嘅就係呢類情報。因此，有唔少人會旁敲側擊、扭盡六壬向身邊嘅同事套取呢類敏感資料，但就唔係咁容易得逞，想同事主動爆料，就更加係癡心妄想。
唔少公司為咗避免員工之間因薪酬差距影響工作氣氛同生產力，都會實行薪金保密制度，不過，就算每個人都對自己嘅薪金守口如瓶，其實仲有好多方法揭開呢個秘密。除咗開門見山、直接走去問目標人物：「你每個月搵幾錢？」之外，《Money》雜誌網上版就醒咗幾招，教人點樣套料、知己知彼。

【方法一】呢個方法既簡單又快捷，只需上網搜尋有關資料；問題係打工仔最想知道嘅，其實係公司內部員工嘅薪金差距，而唔係同其他公司比較，因為佢哋最忌同工唔同酬，最驚自己嘅待遇寧舍差過人。

【方法二】喺公司搵個傾得埋嘅同事，話佢知你想向老闆要求加薪，叫佢畀啲意見，或者亁脆問佢知唔知某個職位嘅薪金水平。如果佢年資較長，對公司情況比你熟悉，大家又份屬老友嘅話，通常都會肯過啲「堅料」畀你。

【方法三】多啲留意自己所屬行業嘅招聘廣告，因為呢啲廣告嘅內容，通常都會涉及有關職位嘅薪酬待遇，相信亦都係最貼市嘅資料。一旦發現自己真係受到不公平對待，仲可以索性去應徵嗰個新職位。
與其眼紅人哋薪酬高過你，倒不如做好自己嗰份工，或者索性直接問老闆對自己嘅表現有何不滿，再努力改善不足，等佢知道請咗個好伙計幫手、加你人工，咁咪雙贏囉！