36歲台灣女星安以軒同澳門德晉集團CEO陳榮煉今晚喺台北文華東方酒店舉行婚宴，一對新人精心準備7項伴手禮送俾賓客，其中包括馬卡龍、保養品、黑枸杞、茶杯、香水、飾品同手機，呢啲禮物都係親朋好友贊助，代表對新人滿滿嘅心意。

現時主力喺大陸市場嘅安以軒，喺內地有唔少好友因辦台證問題未能出席，見證佢嘅婚宴，安以軒專程準備咗超豪華回禮俾啲中國好朋友，被好友稱為「大禮包」!

據知回禮當中最貴嘅係訂製款美圖手機，市價約值9999元人民幣，美圖手機禮盒係藍色，搭配「希臘風格」婚禮主題，上面印有燙金字，手機wallpaper係安以軒同老公嘅婚照，訂製手機分為紅色同白色，「閨密版」可以拎到比較特別嘅紅色，「因為閨密版要特別一點點」，至於一般賓客拎到嘅都係純白色手機。