世盃分組賽戰果大部份都幾正路，普羅球迷應該都有進賬。不過踏入淘汰賽，就真係難賭好多，德國對瑞典開唔到大，可能已經令人損手；阿根廷法定時間贏唔到墨西哥，可能好多球迷隨時1場輸番晒。
小弟之前已經講過，淘汰賽真係唔好再追上盤，尤其是讓到一球以上，真係「瞌埋眼」博下盤好過。
今日頭場巴西對加納，真係就算初學賭波嘅，都會買巴西，5屆冠軍對世盃新丁，唔大炒就有鬼！不過，呢個世界真係有鬼，阿根廷嗰場全世界聚咁多飛，結果加時先贏。對巴西來講，贏1球又晉級，贏10球又係晉級，為乜要大數幫你班上盤客先？
好多球迷都俾巴西上場大炒日本呃咗，以為巴西真係復蘇。不過睇番嗰場形勢，日本要贏波先可以出線，中後場畀大量空間巴西發揮，朗拿度話就話入兩球，狀態根本冇乜提升。仲要留意上仗打到識飛嘅一對翼衞施仙奴同基拔圖又會收埋，用一對老人家卡富同卡路士，巴西打快攻？Noway啦！

艾辛缺陣可靠艾比亞

加納繼續非洲黑馬本色，年輕力壯，雖然球迷最認識嘅艾辛停賽，不過之前分組賽所見，艾辛經常同隊長艾比亞爭分波、爭波射，今仗冇艾辛，實力唔一定削弱。
同日尾場又係要下盤，西班牙分組賽3場全勝，入8球只失1球，好似係威係勢。不過，西班牙出名「分組賽醒神，淘汰賽失魂」，唔講大家未必知，西班牙喺大賽淘汰賽法定時間贏波，已經係94世界盃嘅事。法國班老將攻力雖然一般，不過防守力仍然唔錯，受讓平/半真係穩陣。
牽牛