法國女士極愛洋甘菊茶，但飲完後千萬唔好做大晒鬼掉棄茶包，用來外敷亦有護膚作用。用兩片化妝棉夾住茶包，稍待五分鐘使其降溫，將之輕柔地順眼睛輪廓輕拍，即有消眼腫之效。另外法國美女極愛矢車菊花露水及金盞花水，不但可紓緩眼睛疲勞，更可緩解宿醉頭痛，飲多兩杯香檳，都唔怕第二朝返工頭赤赤啦！

玫瑰花水除直接噴上面外，亦可製成有提神作用的花水冰塊。先將玫瑰花水倒入製冰盒，如覺得狂倒玫瑰水太貴，亦可用熱水沖泡玫瑰花，製成冰同樣有效！

製成冰塊後，用紗布包裹，來回繞擦臉及頸，就可幫助緊緻毛孔。平時於辦公室辛勤工作過後，臨收工前去洗手間按摩一下，更有安定彩妝之效，過後補妝更貼服，就唔怕收工殘樣盡露。

記者：楊麗珊
攝影：伍慶泉