騎師蘇狄雄（洋名：Ben）喺上星期三（6日）憑「驫驫」贏出傷癒復出後嘅首場頭馬，師傅何良賽後話Ben係自己嘅「半邊仔」，見到佢抖近一年後重返凱旋門都特別開心。「驫驫」當晚抽到極有利嘅1檔，今晚（13日）兩師徒亦有一匹馬抽到靚檔需要留意，就係第三場四班1200米隻「銀亮之星」。

「銀亮之星」一連三場交俾見習生潘明輝壓陣，呢三場都能夠交出追勢，攞到1亞1季1個第五，偏偏就係同頭馬無緣，咁啱潘明輝正值停賽，「銀亮之星」一定要換人，雖然有其他騎師睇中索騎，但良哥最終決定交俾「自己人」出擊。

「銀亮之星」亦好彩抽到4檔，同場有「大四喜」同「全勝姿態」等快馬搶放，相信步速唔會慢，會有助呢匹後上馬發揮，如果「銀亮之星」順利開齋，何良一定會更鍚Ben呢個「半邊仔」啦!