由「台灣最萌男友」劉以豪、《閨蜜》陳意涵、《女朋友。男朋友》張書豪同陳庭妮主演，主打催淚嘅電影《比悲傷更悲傷的故事》上星期台灣同香港同步上映。同期香港有荷李活電影《箭神．第一戰》（Robin Hood）上畫。《比》片噚日單日票房收52萬元，高出《戰神》嘅38萬元，成為單日票房冠軍。《比》片截至噚日上映6日累計票房311萬，仍然落後《箭神》上映7日嘅535萬，不過照呢個走勢，《比》片有機會反先。電影公司方面亦安排咗陳庭妮同張書豪，今個周末嚟香港謝票谷戲。

戲入面有唔少金句感動人心，包括「人一旦習慣了孤獨，那才是比悲傷更悲傷的事」、「我不喜歡永遠，因為兩個人其中一個人不在了，就不是永遠了。但是下輩子不一樣，聽起來就像是個約定」、「愛情如果能夠解釋，世界上就不會有人因此而痛苦了」、「不要輕易把傷口揭開給別人看，因為別人看的是熱鬧，而痛的卻是自己」。呢啲金句亦都引起鍾意喺戲用金句表達情感嘅葉念琛欣賞，佢用咗4隻手指公、4個喊嘅emoji，表達對套戲嘅評價，大概意思係「好睇同感人」。有網民睇完葉導嘅「評論」，用番emoji做回應，還以其人之道。亦有網民留言「愛情葉念琛大導而家用emoji寫影評好嘢啊，可能真係比悲傷更悲傷的故事」、「 MK活地亞倫 真係與眾不同...」。

精選娛聞，喺晒《娛果》 http://fb.com/appledailyent