【英超開鑼】點評新球季波衫之最 邊件最潮？
蘋果日報 2020/12/08 22:37
英超開鑼波衫曼城曼聯利物浦車路士
最好賣：利物浦主場配英超金章
上季首奪英超冠軍，利物浦波衫幾可肯定大賣。
成件波衫最重要當然係依個英超金章啦！
上屆利物浦一吐烏氣，終於捧起冠軍獎盃，阿樂同Nicky都話好多利迷都嚟印返個金章，慶祝愛隊首個英超冠軍，肯肯定係最好賣！
最喜出望外：阿仙奴作客
阿仙奴話作客波衫係向高貝利球場東看台大理石廳致敬。
近睇又真係幾似乾咗嘅血跡。
之不過上月着住新波衫捧盃，咁好腳頭自然有唔少球迷追捧。
阿仙奴今季作客波衫嘅大理石花紋俾人話似血漬，惹來球迷恥笑。之不過笑還笑，唔少人見到實物又覺得OK，加上阿記上個月著住佢喺社區盾奪冠，阿樂話而家都有人問佢仲有無返貨。
最「簡潔」：列斯聯主場
列斯聯主場新波衫玩復古，雖然設計簡單，但淨係重返英超都夠gimmick吸引球迷買返件。
要數今屆英超最「簡潔」波衫，非升班馬列斯聯莫屬。純白色波衫加埋肩上三間，設計一眼睇晒，但作為英國老牌球會，唔少球迷都對列斯聯有份情意結，事隔16年重返英超，波衫無乜Design照樣賣斷市。
最特別配色：曼城作客
曼城作客新波衫大玩黑銅配色，十分罕見。
近年曼聯、利物浦、紐卡素同李斯特城都出過黑襯金款式，今季曼城就走得更前，推出黑銅配色嘅作客波衫，連賣咗咁多年波衫嘅阿樂同Nicky都話依個組合相當罕見，有唔少球迷追捧。
最大膽：西布朗第二作客
西布朗沿用返上季嘅「Barcode」波衫，第二作客仲用紅襯黃配色，挑戰球迷視覺。
除咗列斯聯，「升降機」西布朗同樣重返英超。今季佢哋推出一式三款直間「Barcode」波衫，第二作客仲用埋紅襯黃組合，驟眼睇十足十鹹牛肉罐頭，不得不佩服Puma嘅大膽。
最潮：曼城第二作客
米色波衫加上佩斯利圖案，設計認真前衞。
除咗作客波衫，曼城嘅第二作客嘅設計同樣劍走偏鋒，米色衫印上佩斯利圖案（Paisley floral pattern），設計認真前衞，但畀外國網民笑似病毒，仲評佢為史上最醜。靚唔靚就見仁見智喇，但查實佩斯利圖案一直係英倫搖滾樂壇嘅象徵，經常出現喺外國Fashion Show，就連潮牌Supreme都用過，肯定係今季英超最潮款式。
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！