當年今日
關於我們

  夏鼎基教仔納稅人錢勿亂花 - 李八方

蘋果日報 2003/07/28 00:00


財爺一職懸空,正所謂聞戰鼓思良將,最近同英國大狀小夏鼎基傾開二十三條,八方諗起佢父親、七十年代嘅財爺夏鼎基爵士,佢一手奠定「積極不干預」財策,曾蔭權及任志剛皆係佢門生;不過講到堅守原則同謹慎,阿松甚至煲呔以至老任就差幾皮。

阿松二百萬修葺官邸
夏鼎基六二年來港,八五年退休後回英國老家,之後十年冇踏足香港,原來係因為守原則,認為做完官唔應該再留喺殖民地指手劃腳。直至九五年小夏鼎基極力游說,話返香港睇吓冇問題,佢先肯東來,見到香港發展神速非常開心,可惜呢次係佢最後一次香港之旅;九九年,夏鼎基於倫敦病逝。
小夏鼎基特別講咗個小故事畀八方聽。話說夏鼎基七一年出任財政司入住壽山村道官邸,小夏鼎基同細佬妹向父親提議,搵人修剪官邸內雜草叢生嘅網球場,等佢哋可以打吓波。點知老父一口拒絕,理由係「唔能夠亂花納稅人一個便士」,結果幾兄妹只好自己去球場除草。小夏鼎基重加多一句,叫八方一定要記低,就係𠵱家財司官邸嘅車房比佢當年嘅大咗好多。
記得阿松上任時,花咗二百四十萬修葺官邸,可惜佢咪間戇居只住咗年幾;球場仍在,人面已非。


傳真︰2623-9278
電郵︰[email protected]