煲呔曾「強政勵治」登場，雖然因為唔敢禁四川豬肉入口，被人懷疑佢嘅強政係咪得個講字，不過下亞厘畢道一眾高級公僕，就一啲都唔敢怠慢，除咗返工放工去食晏時，要預備更充足時間之外，更要適應新（或者回復港英時代）嘅開會文化。
話說各部門首長，大約百幾二百人，會定期開一個會，呢個部門首長會，由政務司司長主持，但係既然咁多人一齊開，一定得過講字，唔使旨意有實質內容，加上高官問責之後，人人各自為政，所以喺董建華時代，即係煲呔做政務司司長主持呢個會之時，好多首長都借頭借路，例如話撞咗其他會、有其他活動之類，總之就係唔開會。

強政包括強身健體

八方可以想像，阿煲呔見到咁多首長唔畀面時個樣有幾㷫，所以佢一黃袍加身，就要勵治畀大家睇，佢以特首名義，出咗個備忘畀一眾高官，嗱，大家一定要記得去開會，千祈唔好唔捧阿肥龍場（行文語氣當然嚴厲好多啦），否則呢，我哋會點名㗎！
有部門首長話，忽然之間覺得自己好似回復學生時代咁，唔准走堂，老師搵個班長點名，如果缺席，可以肥你佬；佢重話咁都好，以前自己開足會，人哋就唔開，𠵱家咪一視同仁囉。
至於返工放工食晏要預充足時間，情況係咁嘅，由於政府總部大樓得嗰兩部𨋢，而煲呔出入，佢嘅隨從會㩒住部𨋢恭候佢老哥，好似前日就㩒咗成四個字，咁大家得一個鐘頭食晏，惟有行樓梯啦。所以強政個強，係包括強身健體咁解，大家行多啲，身體好嘛。


爆料熱線：29290000、27860099
報料傳真：26239278
報料電郵：[email protected]