泰國賣座電影《出貓特攻隊》喺香港打破咗《人妖打排球》於2000年創下嘅紀錄，成為本地最賣座泰片，繼三位主角「賓爺」Non、「劉蓮」Aokbab及「柏豪」James先後襲港後，片中飾演「明詩」嘅21歲新世代演員依莎亞賀素雲（Oom），早前落實會單拖襲港，於大後日以「Live More 新星」身份出席「星展銀行Live More SnapTag 活動」。

「明詩」Oom被封「泰版朱千雪」，所以大後日出席活動就會同朱千雪相遇，而粉絲想先睹「明詩」嘅風采嘅話，機會嚟嘞！「明詩」後晚就會乘坐於7時45分抵港嘅TG606航班到港，粉絲到時就爭取機會喺機場見「明詩」，之前《出貓》三位主角來港都好親民，喺機場亦有親民同粉絲合照，估計「明詩」亦都有機會任影唔嬲。