反送中運動爆發至今超過半年，數百場警民衝突下，作為主戰場之一的銅鑼灣區可謂一步一「戰績」，四處可見示威者以噴漆寫下的罵警字句。在銅鑼灣區居住廿多年的曾小姐指，7至8月每逢大型遊行後銅鑼灣鵝頸橋下都必然有大批防暴警猛射催淚彈，情況持續數月且不斷惡化，有警員更無故以粗口辱罵街坊，甚或以大光燈照射大廈單位挑釁居民，「有牌爛仔真係好套入佢哋，佢哋講粗口就得，我哋講粗口就唔得！憑咩呢？」她直言，警方行為令區內越來越多街坊不滿，迫使本來不理世事的中年男女都上街抗暴，齊心寸爆警員「有正常人唔做做警察，仲做得你咁冇尊嚴！」

記者：林穎嵐　　攝影：麥超億

居於聖保祿醫院附近的曾小姐，在該區居住廿多年，她在過去半年裏參與多場和平示威遊行，但遊行結束後返家途中往往會遇上警方無故封路。她指軒尼詩道的鵝頸橋橋底，7月至8月期間的遊行日子，警方幾乎每逢周末定時定候封路兼狂發催淚彈，「我的確有好幾次都聞到好唔舒服，我由7月開始已經患上呼吸道感染，到依家都仲咳緊。」曾小姐表示銅鑼灣有許多年長居民，警方肆無忌憚狂射催淚彈罔顧街坊安危，「有次喺時代廣場附近電車路，我見到有個男士因為聞咗催淚煙暈低，要記者同急救員幫手急救。」她直言，不少街坊都經常在直播畫面看到有小朋友被打至頭破血流，加上警暴如此擾民，自然辣㷫大批街坊群起圍鬧警察以守護家園，「慢慢見到啲街坊會行出來，唔止係後生仔女，仲有好多姨姨、叔叔、公公或婆婆都會行出嚟（指罵警員）。」

曾小姐形容每當港島大遊行後，大批警方會集結於銅鑼灣及灣仔一帶，「有次遊行完，我同我朋友一齊企喺天樂里附近，當時警察設路障，又用燈照住班街坊， 仲用燈不停照上人哋屋企。」她當時與朋友站在天樂里街口注視警員一舉一動，「當時有好多街坊都有鬧警察，叫佢哋『收隊啦！都冇示威者啦！』我都同佢講：『你企喺度唔辛苦咩？你覺得你企喺度你會有任何得着咩？你咁做係會令大家更繃緊。』」曾小姐笑言她高聲地跟警方理論，但多名防暴警面對道理顯然無言以對。

除了大遊行後的警民衝突，曾小姐指，該區亦因不時有和理非活動而引起街坊與警員衝突。她憶述10月份時曾於百德新街參與「和你唱」活動，有三輛警車在附近戒備，有警員突然情緒失控飛撲街坊。「嗰日夜晚8點幾，我哋有街坊一齊聚集唱歌同做啲文宣工作，當時有個女士同一對外籍人士講解緊我哋喺度做咩，解釋點解啲警察會嚟，有架EU警車就開咪好大聲咁叫個女士唔好同個外籍人士講嘢，個女仔冇聽，繼續講。」突然有數名警員急步落車衝向該名女子，「佢哋好激動，有個警員仲激動到衝落嚟唔小心成個仆咗喺個女仔面前，成個盾牌飛跌落地。」

她形容當時現場有約60名街坊，大部份是OL打扮及踢拖街坊裝，還有數名拿着珍珠奶茶、說着一口非純正廣東話口音的中年女街坊在場，「我問：『姨姨你做咩喺度呀？』 佢哋話：『吓！點解啲警察喺度，我咪點解喺度囉！』幾個姨姨都喺度話警察，『你睇吓你哋幾慘呀！連珍珠奶茶都冇得飲！』」曾小姐認為，這群中年街坊都是不滿警方各種形式的警暴，直言警員剝奪居民自由，「佢哋都覺得係警權過大，先會出嚟鬧警察，連佢哋都肯企出嚟，肯為呢個社會嘅不公出聲，係好值得欣賞。」

「我真係唔驚，我相信呢個時代，附近點都會有人支持你，點都會有人為你出聲，如果我咁易退縮，咁其他人都會跟住有呢個概念退縮。」曾小姐身形相當嬌小，站在一般防暴警身後，其身影幾乎可完全被遮蓋，但她坦言從不懼怕警暴，「我冇做錯事，所以我唔驚佢，我有咁嘅權利企喺（屋企樓下）。」她認為警方近半年多次在銅鑼灣區持槍封路，動不動喝罵街坊甚至擎槍指向長者，令人相當憤怒，「如果警察攞住支槍要射殺我，咁係證明警察失去理智，佢哋唔配做警察……其實我日日都咁諗，佢哋可以隨時攞支警棍打你，或者隨時攞支胡椒噴霧嚟噴你，你控制唔到自己心態或者控制唔到自己理智，咁你交返（武器）出嚟先啦！」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568