憑韓國選秀節目《PRODUCE 101》出道嘅人氣限定男團Wanna One，出席埋下月舉行嘅各大頒獎禮就會正式解散，而組合早前宣佈將於下月24號至27號喺首爾舉行告別演唱會，粉絲後援會嘅會員可於噚晚率先買飛，餘下嘅門票就喺今日晚上公開發售，不過由於Wanna One粉絲眾多，8萬張門票早已完售。

Wanna One最後一次合體，吸引大批粉絲瘋狂搶飛，同時有粉絲發現，演唱會門票亦被黃牛黨放到網上炒賣。據粉絲公開喺黃牛網站票價，原先僅買11.9萬韓圜(約832港元)嘅企位門票，被炒到2千萬韓圜(約13.9萬港元)，而原價10.8萬韓圜(約755港元)嘅山頂區坐位門票，亦被炒到38萬至43萬韓圜(約2,656至3,006港元)不等，相當誇張，黃牛嘅票價亦引起粉絲熱議，紛紛鬧爆黃牛黨，寸爆留言：「係坐喺偶像腿上睇騷？」、「呢個價係可以上台成為第12位成員一齊表演？」等。

精選韓流，喺晒《娛果》
http://fb.com/appledailyent