ViuTV最新《晚吹》系列《男人講嘢》今晚(11號)將會首播，今次搵咗鄒凱光（灘叔）、DJ阿檸、主持Thor(駱振偉)做主持，故事內容以兩性關係為題材，鄒凱光自爆有睇AV呢個習慣！

節目其中一個主題講男性睇AV，灘叔直認經常睇AV：「等於你揭八卦雜誌，冇乜實質生理需要，kill time（打發時間）之嘛，呢個係我嘅年代睇法，對我來講睇咸戲係呼吸，唔會專登話俾人聽我睇，但一有時間就睇，覺得啲女仔幾靚喎，唔一定係性幻想，會睇埋拍攝角度，我鍾意肥少少類型女仔。」阿檸同阿Thor比起灘叔嘅年代開放得多，資訊科技發達，進化到線上分享，手機隨時有得睇，阿檸就試過喺街上開咗條lane，唔知道係AV，又冇用耳筒，搞到好尷尬。

之不過唔係個個女性都接受到另一半睇AV，如果另一半知道又點呢？灘叔笑言：「我反而覺得呢啲事只會令兩個人有情趣，關係好咗，你話揭發我做善事就奇啫！」灘叔仲分享睇AV攞靈感，佢話：「我廿四小時開㗎，我寫嘢時，套戲傾偈、行動，到啪啪聲，我望住我張仲係白紙時，自己會鞭策自己，呢啲片對我來講只係動作片，一樣係講對白、中間打鬥、爆炸、ending。」

灘叔又話向呢個AV文化致敬：「你睇日本人請食飯唔係食飯，而係去歌舞伎町玩先，宣洩後大家就專心工作，呢樣嘢真心為男人好而唔係批判，我好想話俾女性聽，女人都唔好一聽到睇AV就反對同鬧，可以細聲啲又或一齊睇。」