【專題籽：有種職業】
「平時都是自己一個人工作的。基本上不會有閒人出入，所以無論你多努力，多用心工作都沒人知的。」江偉業（江Sir）是位鋼琴調音師，已做了14年，他常出入演奏廳與錄音室，不過當演奏家出場，他就退場。不被看見的匠人，卻是演奏家重要的支柱。

早幾日有客人找他調琴，$450的調音費對方殺價到$350，江Sir拒絕，「你去看醫生時，會跟對方講價嗎？」對方回：「抱歉，你不是醫生。」平時好少發火的江Sir將對答貼上自家facebook，「是否醫生以外的其他行業就可以任由壓價!?!? 這到底是甚麼道理!?!?」怨念post一日就有45萬個views，五千多個回應。但留言裏越多人爭論，「醫生救急扶危你點同佢比。」越凸顯「原來一門專業的尊嚴都要分階級」的問題。
工科出生者如攝影、設計、插畫、木匠等，在香港市場總面對一條刺——壓價。客人想要優惠的，江Sir不介意「做多少少」，但大手殺價者背後心理，先令人後腦標煙，「問佢覺得應該幾錢，又話『唔清楚』。佢哋對眼前師傅所花的時間、技術、背景都不太想知道同了解。只係想你『平畀佢』。」

長期調音患肩周炎　淨係想調靚個音

江Sir小時候住七層高公屋，覺得別人彈琴好型，成個王子咁，發現有鋼琴調音學徒一職，感覺神秘又美麗，「第一年考不到『通利琴行』調音學徒，諗住申請埋做sales賣書，入咗大公司先搵機會調職啦！都入唔到！（笑）等咗三年終於考到！」除了食飯的半個鐘，他一星期六天，一手舉着握着調音桿，一手按琴鍵，每日八小時一直叮，一直叮。曾回大陸培訓半年，百來呎的房間三個人三把琴一把風扇，又熱又焗，「汗一直滴，嗰幾個月我冇着過上衫。咁難得考到入去梗係搏命練。」長期姿勢問題右手好快肩周炎，整隻手都抬不起來，手指變成彈弓指。西醫說那是抽餸抽了幾十年才有的婦女手，雖要扎針治療，卻難掩自豪感，「唔諗乜有型王子㗎啦！目標唔同咗，淨係想調靚個音。」
「我諗阿爸阿媽都唔知我做緊乜，淨知同鋼琴有關，維修吓咁。識唔到女仔啦！」人人以為他識好多女鋼琴老師、演奏師，近水樓台，但他真係要好專心，身邊乜嘢都睇唔到。好耐以前又有個女仔知他是調琴師，淨問他：「會唔會轉工？」，佢嬲咗。生活中，他對聲音特別敏感，「最怕吸塵機聲，呼呼呼的，唏！（打冷震）。」最愛聽Rock and Roll、Metal、爵士樂同女歌聲，但有調音工作的前一天，他會保持穩定平靜的心境，回家電視也不看，又從不用耳筒，怕影響聽覺。搭巴士永遠坐最後排，避開大聲講電話或開大喇叭打機睇戲的聲音。左閃右避，直至小學同學聚會時赫然發現同學拖住兩個女，有車有樓有事業，才驚覺時間過得好快！「我仲覺得自己好年輕咋喎！原來過咗咁耐，好似喺第二個時空返到現實咁，有啲失落。不過冇計，咪又走返入自己時空囉！」

視障人士學調音　調完耳痛要瞓覺休息

除了日日埋首工作室外，他還教視障人士學調音。學生佃小帆（Calvin）現在一星期五日，朝九晚五地練了年半。本讀生物科技，讀書好叻的他一開口就呼救：「好難！非常難！（笑）我覺得調音係一門藝術，調得準與調得好，與音色靚之間，差別可能好細好細，但感覺就大不同。」88個琴鍵，每個3條琴弦，個半鐘調完264條弦（仲要佢哋和弦得好），調完第一件事係瞓覺休息，「太專心，有時因為靠近琴弦聽，調完耳仔會痛。」
他與江Sir都認為，匠人不被尊重，是因為人們不了解，「有啲人同我學，學咗四堂就話想接Job！有啲則下載個app，調準或差不多，就是了。」江Sir更說，好多人買琴就是購物，朋友說好、大牌子，就買。「佢哋未必因為鍾意乜嘢音質，而揀乜嘢牌子嘅琴，所以出現14年才調一次琴，或者個琴走晒音都唔知嘅情況。」然後，就是各式各樣的標籤，如見Calvin視障，就想壓價；傳媒訪問又鍾意揀他皺眉的相片，拍到他落泊陰功又無奈，都是無形標籤作祟。江Sir說：「始終工字不出頭五字已經根深柢固。但明明除了術科外，工科在外國都很受重視，有專門的學校，可以做一世的職人匠人。」被邊沿化，但他仍覺得，「你要先有自豪感，相信自己做的事，不自貶；負責任做到最好，才可影響身邊的人。」

記者：陳慧敏
攝影：劉永發（部份圖片由受訪者提供）
編輯：施明慧