停不了的黎明,停不了的阿明!
黎明(Leon)同「腦細」林日曦合作拍嘅咖啡廣告,因為Leon情深演繹一曲《情深咖啡未曾飲》,由前晚8點45分開始不停俾網民瘋狂洗版,截至呢一刻瀏覽人次已經有360萬人,真係超勁,網上今日再出現一條2分幾鐘嘅廣告花絮片,喺鏡頭前做腦細林日曦公司小職員嘅Leon,可以話完全發揮佢嘅腦細本色,話題由社會要轉變講返去佢之前食咗隻好難食嘅熱狗(估唔到Leon為咗條腸會咁耿耿於懷),就連反光板有幾重要都談論埋喎,大家見過咁健談嘅Leon未呢?
除咗天南地北都講一餐,Leon仲喺鏡頭後爆金句,包括「社會要轉,如果個個都咁做嘢,地球點會有iPhone同android」然後又話「一間公司咩類型嘅員工都有,我哋唔應該用一個角度去睇員工」,最最最重要嗰句呢就一定係「無層次低嘅人,只有自甘墮落嘅人」嘩,呢句都係要袋落袋呀!