由韓團JYJ成員朴有天同女星申世京主演嘅SBS新劇《看見味道的少女》，將於下月一日首播。今日，劇組就公開一系列朴有天嘅現場拍攝劇照。

照片中，於劇中飾演警察嘅朴有天騎住送pizza外賣嘅電單車拍攝一場追擊逃跑犯人嘅場景。

據知，拍攝時朴有天先同工作人員認真核對揸車路線以及表情，工作人員表示：「朴有天冇用警車而係用電單車追擊係有原因。究竟理由係咩，會喺第一集中公開，另外都會公開佢同女主角申世京相遇嘅故事。」

《看見味道的少女》改編自人氣漫畫，講述無感覺嘅警察同可以見到味道嘅少女之間發生嘅浪漫愛情故事。