【洛杉磯一哥】又一里程碑 卡路士韋拿平美職單季入球紀錄
蘋果日報 2019/09/30 17:25
伊巴謙莫域金靴獎美職聯洛杉磯銀河卡路士韋拿FC洛杉磯祖斯夫馬天尼斯
周日美職聯，卡士路韋拿為FC洛杉磯先開紀錄。
周日美職聯，FC洛杉磯喺卡路士韋拿先開紀錄下，畀明尼蘇達聯追返一粒逼和1:1。不過，呢排經常被拎嚟同洛杉磯銀河皇牌伊巴謙莫域比較嘅韋拿，射入呢球後平咗美職聯單季個人入球紀錄，加上今季入球助攻數字都靚過伊巴，唔知伊巴今次會用乜反擊呢？
今季美職聯最佳球員，韋拿最近經常同伊巴爭論呢個問題，不過周日後韋拿又多樣有力數據同伊巴拗喇。今場70分鐘，佢喺禁區用招牌左腳勁射，成功幫洛杉磯先開紀錄。雖然5分鐘後即被明尼蘇達聯追返粒，最後仲被逼和，不過呢球已經係韋拿今季第31個入波，追平阿特蘭大前鋒祖斯夫馬天尼斯保持嘅美職聯單季個人入球紀錄。今季目前為止，韋拿踢咗30場射入31球繼續領先射手榜，後面嘅伊巴仲落後緊兩球。兩隊都殺入季後賽之後，常規賽淨返最後一場，睇嚟金靴獎非韋拿莫屬喇！