連諾貝爾經濟學獎得主克魯明教授，喺《紐約時報》專欄都曾經劈頭問過一句：「白高敦（英國首相）拯救了全球金融體系乎？」就知道呢個木口木面嘅首相，舊年喺英倫三島向當地銀行推出注資拯救方案，成為環球救市藍本嘅威力有幾勁。

咁，畀呢位首相禮賢下士，延攬入政府班子嘅渣打集團（2888）非執行主席Mervyn戴維思，自然就更加人氣急升，威震中環。
渣打噚日收市後發公告，話Mervyn獲委任為英國貿易促進和投資部部長，即日起辭任集團董事；至於主席工作，就由渣打副主席兼高級獨立董事、兼Burberry集團主席JohnWilfredPeace暫代執行。
次按引發環球金融海嘯，渣打非但冇辣埋身，業績仲好標青，之前英國傳媒仲流傳，話白高敦力邀Mervyn擔任蘇格蘭皇家銀行主席，結果佢棄商從政，成為少數由賓架轉行做高官嘅先例。聽講，戴維思第日嘅頂頭上司，係英國商貿大臣文德森，雖然Mervyn呢個部長職位唔係內閣成員，但屬於有權出席內閣會議嘅非內閣成員，佢老哥𠵱家至56歲，大把機會上位，日後晉身內閣甚至喺政壇上問鼎更高位置，絕對唔奇。
近年事業冒升好似坐直升機嘅戴維思，發迹史同香港好有緣，所以佢特別鍾情呢個國際都會，每次重臨香江，對住閃光燈同鏡頭都靈舍生鬼活潑，妙語如珠。

98年佢以集團東北亞執董身份嚟香港報到，仲兼任銀行公會主席，任內處理過辣手嘅粵企債務問題。01年底以49歲之齡，出任集團行政總裁嘅「冧巴two」高位。06年底更上層樓，晉升非執行主席嘅一哥位置。舊年，佢又獲曾特首委任為經濟機遇委員會成員，經常穿梭倫敦香江兩地。

李華華
mailto:[email protected]