當年今日
關於我們

【惡法真面目】陳景生拆解修訂:引渡政治犯 必然搵其他罪名掩飾

蘋果日報 2019/06/09 00:01

陳景生送中惡法真面目引渡惡法逃犯條例

港府硬推《逃犯條例》修訂,保安局局長李家超更指法律界因「誤解」,以致反對修例。面對惡法修例殺到埋身,《蘋果》即日起找來法律界權威人士,將每日為大家解釋對修例的看法,逐點反駁李家超「誤解論」。
今日就由大律師公會前主席、資深大律師陳景生,戮破《逃犯條例》修訂的謊言。
問題:政府經常指「政治罪行」不移交,試圖安撫市民對《逃犯條例》修訂的憂慮,但政府的修訂建議真的能保障市民免因異見及或政治問題被移交?
資深大律師陳景生:而家政府當然會話「政治原因」不移交,但最大問題係:乜叫政治、乜叫唔係政治,邊個決定?除非引渡國傻傻哋,否則若要引渡政治犯,必然可以搵其他刑事罪名作掩飾,甚至《基本法》23條立法後會出現更大嘅詮釋空間。無論如何修訂都不具逼切性,唔應該倉卒而行,港府急修例反而令人覺得有hidden agenda,究竟修例係咪純粹香港自己決定?
「一國兩制」下,特區政府有責任維護香港任何人嘅人權所受嘅法律保障,包括移交後嘅人權保障是否獲得保障?呢點係行政機關維護法治嘅基礎。即使內地司法制度有改進都好,但仍然有理由相信,內地講嗰套未必係執行嗰套,港人對「送中」條例嘅憂慮,唔係危言聳聽,而係例子太多,但特區政府卻歸咎反對聲音係因為不理解。
港府一直唔敢評價內地同香港嘅司法制度差異,呢樣係香港市民最想知道,但特區政府完全冇出聲,反而帶你遊花園;而今次港府處理修例嘅方法,以及中聯辦閉門會議促建制支持,令人更擔心香港係咪真正有一國兩制。
民陣6.9反惡法遊行
日期:6月9日(日)
集合地點:維園草地
時間:下午2時30分集合、3時正起步
遊行路線:維園草地遊行至金鐘添美道立法會
(資料來源:民陣)
-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
empty
《蘋果》製圖