【新增內容】日本尊尼組合V6嘅37歲成員岡田准一同拍拖多年女星宮崎葵，於聖誕宣佈婚訊，岡田原本預定今日平安夜寄到fan club會員手中嘅聖誕卡，因提早有粉絲收到將岡田婚訊外洩，雖然岡田於聖誕卡未有提到另一半姓名，外界都估計其對象係宮崎葵。

兩人會今日透過聯名簽名信正向外發表婚訊，並指已於噚日註冊結為夫婦，內文提到：「謹向大家報告我們已於12月23日結婚了。雖然我們還不夠成熟，但希望今後能不辜負大家的期待，努力向前邁進，也期盼各位繼續給予我們如同以往不變的支持。」而知情人士透露宮崎葵並冇懷孕，一對新人未計劃幾時舉行婚宴，但據指唔會大搞，並計劃於夏天度蜜月。兩人於2008年拍電影邂逅，宮崎葵喺2011年先與前夫高岡奏輔離婚，當時報道已指佢同岡田准一疑似發展婚外情。

岡田准一兩位V6隊友森田剛同三宅健亦向兩人送上祝福，三宅健話岡田准一係隊中最年幼成員，估唔到呢日終於來臨，覺得好興奮。而岡田准一嘅同門大師兄東山紀之，今日喺節目上報道其婚訊時，都寄予祝福，不過東山紀之就話雖然近排有同岡田准一見面，但對方就冇提過結婚嘅事。

更多娛聞，喺晒《娛果》
http://fb.com/appledailyent