【新增動新聞】

對於場上犯規以至暴力行為，中國足協近期嚴厲打擊，傾向重罰球員。上海上港嘅巴西中場球星奧斯卡杜斯山度斯，喺周日嘅中超度，兩次將皮球踢到對方球員身上而引發球員大規模衝突，結果被罰停賽八場。不過，奧斯卡並唔係近期中國足協罰得最重嘅中超球員，最重嘅應該係上海申花中場秦升。

喺三月一場中超比賽，上海申花中場秦升惡意踩向天津權健中場韋素隻腳，被罰紅牌，引起軒然大波，最終佢被中國足協判罰停賽半年，同埋罰款12萬人民幣。除中國足協，申花都罰秦升30萬人民幣，咁都唔止，申花仲將佢踢落預備組，同埋扣佢人工，由42萬人民幣月薪，扣到得番上海規定嘅最低工資，直至季尾，仲睇吓佢到時有冇深刻反省兼認錯。佢只能靠最低工資過生活，每月2,190人民幣（約2,500港元）。