張惠妹一連兩場《烏托邦世界巡迴演唱會》噚晚喺紅館開鑼，三面台四套衫。雖然阿妹身材依舊豐腴，但個唱戰衣剪裁明顯花過心思，令其身形變得修長。而且阿妹一向都係憑實力取勝，一出場已極具壓台感，全晚勁歌熱舞絕無冷場，全場觀眾high到震，就連阿妹都忍唔住多次大呼:「你們太誇張了！」

噚晚捧場嘅嘉賓包括黃耀明、郭啟華、倫永亮等人，全場爆滿，而且好多fans都係男仔。

演唱會以《戰之祭》開場，未開騷，台上有巨型LED芒，一開場，個芒畫面就好似打開門咁樣，戴紅色毛毛帽嘅阿妹儼如女王，由半空鑽石吊台驚艷出場，有氣勢。

唱到一半，個台吊番落嚟，眾舞蹈員向阿妹跪拜；緊接住阿妹即唱《怪胎秀》已經除帽，仲邊唱邊跳又俯身倒奶，令全場觀眾紛紛尖叫，阿妹問:「你們有點誇張，（演唱會）才剛開始，你們今天很high啊！這個烏托邦是第一次在香港舉行，見到舞台很靠近你們，覺得你們很容易就會爬上來，你們要忍住呀！」