唔知點解，今年季初似乎特別多馬跑完有問題。好似上周六賽事咁，第八場「有醒」同「好加加」翌日分別出現右前腿不良於行同動作不靈活，短期內肯定唔會再跑。
與此同時，當日第九場「信眼光」賽後已經驗出氣管內有很多血，翌日再有左後腿不良於行，幕後呢勻都幾頭痕，而第十場「喜星武士」輸十幾個馬位返嚟，翌日亦出現右前腿不良於行，馬主想拉頭馬相信唔係短期內可以成事。
唔知係巧合定係其他原因，上述四駒當日都喺尾段場次上陣，而且一概名次唔係包尾就係尾二，同場地被踩鬆晒有冇關咁就唔知咯，惟根據馬會條例規定，呢批馬必須通過獸醫檢驗後，先至可以再次出賽。