新特蘭今季係英冠比賽，不過表現仍然未有咩起色，依家仲排緊尾二，睇黎今季要繼續為護級努力。但唔知係咪球迷對球隊表現好不滿，竟然有球迷激進到喺主場光明球場嘅座位上便便？

呢位哥仔叫哥林莫臣（Callum Mawson），17歲嘅佢俾人影到係上周六對雷丁嘅比賽，竟然除左褲咁坐係座位睇波，引起今次「便便疑雲」，紅到連名宿連尼加都將幅相擺上Twitter。幾日後，主角莫臣終於現身說法，表明自己絕對冇便便，「我對於呢一切都好抱歉，好後悔。但我向天發誓，我嗰日一定冇喺球場便便！」咁點解又要睇睇下波褲已除？「我嗰日真係好醉，我諗我醉到以為自己喺廁所辦緊大事。」據莫臣講，佢當日入場前就飲左一打啤酒同半打黑莓汽酒，睇黎以後光明球場都要貼張「酒精害人，開波前咪飲」嘅提示！

因為呢單「便便疑雲」，莫臣相信自己唔會再入到光明球場睇波，不過最慘係連份工都隨時冇埋，仲要因為佢家下咁出名，睇怕短時間內都好難有僱主請佢。而不幸中之大幸嘅，係當地警方決定唔會就「便便疑雲」立案調查。

----------
係你！打造星級球隊，征服各地聯賽！立即加入『BFB CHAMPIONS 2.0』！
http://bit.ly/2xrTKGM