【新增動新聞】

英國傳媒綜合報道，前曼聯後衛里奧費迪南打算喺禮拜二正式公佈，自己會成為一位職業拳擊手！

報道話里奧費迪南準備喺英國時間今日開記招，話有重大消息公佈，一般估計佢係會以38歲嘅高齡，接受一項全新運動嘅挑戰。不過，英國《每日郵報》就唱反調，指里奧費迪南今次最多都係搞個電視騷出嚟，睇淡佢真係成為職業拳手嘅機會。里奧費迪南喺2002至2014年效力曼聯，之後轉會昆士柏流浪踢咗一季後，喺2015年宣佈退休。

英國球壇之前都試過有球員轉行打拳，前鍚菲聯中場活侯斯（Curtis Woodhouse）就曾經喺2014年成為英國次中量級拳擊冠軍。