韓國熱爆組合BIGBANG完成YG家族晒冷騷後，今日由日本飛返去韓國金浦機場。

戴住黑超同口罩嘅G-DRAGON做人肉廣告牌，着住件印有組合名嘅紅色格仔衫行出禁區，隊友T.O.P呢？一身打扮都好有型。

接機粉絲見到呢班男神出現，即時癲晒狂叫，仲擒高影相，本來有欄杆隔住仲好啲，但BIGBANG行多兩步冇咗欄杆，粉絲即刻嚟料將佢哋包圍，搞到BIGBANG寸步難行，真係少啲眼力，都唔可以喺堆人入面搵番佢哋。

另一男團EXO喺日本開騷後，今日同樣返抵金浦機場，場面一樣墟冚，仲要出動機場警察維持秩序。