陳奕迅（Eason）同謝安琪嘅緋聞越傳越盛，噚日更有指徐濠縈為咗激Eason而同陳冠希（Edison）秘密遊日本。噚日Eason由台灣錄音返港，佢喺機場出閘時仲掛咗負離子空氣清新機喺頸度，有fans上前要求同佢合照但被拒絕，Eason笑住話：「我只係畀記者影。」嗰位fans話噚日係佢生日，但Eason堅持只同佢握手祝賀。問到阿徐同Edison去日本嘅報道，Eason笑住話：「咁犀利！冇所謂，最緊要大家開心。」再追問佢知唔知阿徐係咪同Edison去日本？佢繼續笑笑口話唔清楚，至於阿徐同Edison係咪好老友？Eason話：「我同EdisonOKo架，反而同阿徐就麻麻哋。」佢話報道可以令佢保持人氣喎！

嘉玲彭羚返港

另外，劉嘉玲喺外地返港，佢攞住本《聽南懷瑾大師講國學》嘅書，之前賭王三姨太陳婉珍都睇緊另一本關於南懷瑾嘅書《南懷瑾講演錄》，問嘉玲喺邊度返嚟，佢未有回應，但當問到梁朝偉嘅手傷，佢話：「好得差唔多。」彭羚就同女兒返港，佢話由加拿大探親返港，黃曉明就戴住口罩現身。