警隊新一哥曾偉雄下星期二坐正，佢話首要目標係維持香港安全穩定。八方覺得佢絕對唔係講門面說話，眼下香港確實危機處處，就算食個漢堡包都要擔心俾人呃。八方冇誇張，最近麥當勞搞個大富翁抽獎遊戲，捲起一陣食包旋風，但食客投訴一籮籮，好唔和諧。
八方收過唔少讀者投訴，有人話麥記頭獎印花數量唔清唔楚；又有人投訴收到嘅印花，早就俾人揭開睇過，質疑有職員「做手腳」；最奇情係一位施先生，話早就拎到頭獎關鍵太平山印花，但係俾麥記職員老點，搞到35萬信用卡簽賬額見財化水。

「畀番印花我唔會追究」

事緣施先生喺聖誕前帶三個仔女去荃灣廣場麥記開餐，食食吓讀小五嘅囡囡話：「爸爸，我哋中咗太平山呀！」囡囡又話屋企有個淺水灣印花，加埋太山平，正好符合領取頭獎35萬元簽賬額條件。對遊戲規則唔熟悉嘅施先生即時搵麥記職員問個究竟：「個職員話好多人中o架，唔只你一個，仲要抽獎o架。」之後佢再問另一個職員同樣話「仲要抽獎」。
施先生自認冇抽獎命，所以唔重視張太平山印花，唔肯定當時隨手丟低抑或袋走咗，總之事後搵唔番。再過幾日，佢喺另一間麥記聽到食客討論收集印花心得，至知頭獎應該只得一份，而且毋須抽獎。佢於是拿拿聲返去荃灣廣場麥記追究，仲打埋999報警，「但個差人話最多只能當我報失」。施先生已向麥當勞同消委會投訴，仲申請緊法援索償，「我好唔甘心，就係個麥當勞職員亂講令我冇咗35萬」。
由於太平山印花只得一個，如果施先生所言屬實，咁一心為中獎而狂食包嘅一眾食客可以慳番唔使再食喇。施先生話：「如果有人肯畀番個印花我，我唔會追究佢係偷定係執，仲會分10萬蚊簽賬額畀佢；如果最終冇人領頭獎，麥當勞又肯確認我係得獎人，我願意捐10萬畀麥當勞兒童之家。」

麥記：如警調查會配合

施先生正向八達通公司索取消費紀錄，核實拎到太平山印花嘅日期同時間，希望麥當勞翻查閉路電視系統，證實佢當日曾經幫襯並且向職員查詢。麥當勞話如果警方調查，會全力配合。新一哥係CIDMan，查案有一手，呢單「太平山奇案」，唔知有冇辦法破案呢？

mailto:[email protected]