𤓓王吳卓羲又獻新猷！早排無綫播出佢主演嘅《亂世佳人》，口碑欠佳之餘，劇中嘅佢肥腫難分，膚色又黑，型男feel冇晒，跟住又被指欠恩師古天樂錢唔還，負面新聞連環兩擊後，吳卓羲想唔入雪櫃避暑都難。雖然呢期坐多過做，但佢並冇趁機反思喎，日前趁得閒去咗旺角場睇足總盃賽，但人睇波佢睇波，佢就睇到捲入球迷爆粗衝突事件，真係無奇不有。
話說當日賽事由南華對晨曦，但吳卓羲唔係支持曾簽佢出碟嘅BMA唱片公司老闆、現任南華足主羅傑承，而係掉轉槍頭撐晨曦，都算唔畀面。其後南華勝出，兩班球迷起衝突，其間有人親眼見到吳卓羲同明星足球隊俾球迷挑釁，呢件事已經喺香港討論區廣泛流傳，有網民話當時羲哥帶頭還拖，向一對中年男女叫囂：「叫佢上嚟打我吖！」涉及事件嘅仲有吳家樂、尹揚明同EO2成員。

例牌否認

有網友話混亂中有明星隊隊員爆粗同意圖打人，要出動警員平息，由於當日有太多球迷，唔少人喺網上都話見到呢一幕，吳卓羲當然例牌否認，又話嗌交唔關佢事。到底羲哥有冇鬧人，佢自己最清楚，不過歌舞水皮嘅佢以前獲羅傑承蝕本撐佢出碟，今時今日羲哥竟然喺球場公開同舊老細打對台，唔怪得之BMA唔同佢續約啦！