截至上周六（16日），今季跑了5次賽事，13屆香港冠軍騎師韋達仲未開齋，如果呢件事喺早幾季發生，必定係大新聞，但如今香港馬壇已踏入「莫雷拉王朝」，過氣冠軍韋達嘅一舉一動已冇太多人在乎。

自00至01年馬季起，亦即韋達首次登上香港冠軍騎師嗰季開始，係名副其實急先鋒，幾乎季季都開鑼日或第2次賽事就有頭馬見面，12至13年馬季已經係較慢熱，第3次賽事先至贏馬。韋達今季仍未步入凱旋門，騎師榜排尾二，對佢自己嚟講係前所未見。

好在韋達勝在EQ高，面對高低起伏，仍淡淡然講開齋係遲早嘅事，冇理閒言閒語，一得閒就到郊外減壓，近近哋去距離沙田馬場冇幾遠嘅烏溪沙石灘散步，非常重視工作同生活之間取得平衡。

今晚（20日）谷戰韋達第七場三班1200米隻「狀元才」，隻馬自上季初跑獲1亞1季後再冇表現，直至上場今季初出突然回勇，喺同程追入殿軍，狀態有復蘇跡象。

韋達話「狀元才」出閘一向都唔快，今場關鍵在於前段可唔可以跟喺馬群中間，佢唔想落後放頭馬太遠，抽到有利嘅3檔，成功機會自然提高。