前熱刺同車路士領隊波亞斯忽然走去玩達喀爾汽車拉力賽，唔再教中超嘅上海上港，搞到呢隊波要嗱嗱聲請過個新教練。波亞斯本身喺葡超嘅波圖成名，估唔到上港嘅新教練，一樣係嚟自呢支葡超球隊。

現年49歲嘅彭利拿禮拜三正式接替波亞斯，成為上海上港嘅新教練。佢自從今年5月因為慕尼黑1860降落丙組之後，就一直無嘢撈。其實彭利拿都有啲來頭嘅，佢係2010/11球季果陣已經係波圖嘅助教，果時坐正嘅就係波亞斯，佢兩個聯手贏過葡超、葡萄牙盃同埋歐霸盃。波亞斯喺2011/12球季走去英超教車路士，彭利拿就接手成為波圖教頭，之後贏過兩屆葡超。

彭利拿之後再教過沙地阿拉伯球隊艾阿利、希臘嘅奧林比亞高斯、土耳其嘅費倫巴治同德國嘅慕尼黑1860，不過四份工都打得唔長，頂多都係得一季貨仔，其中奧林比亞高斯同慕尼黑1860，咁啱都係領軍20場就走人。即管睇下佢今次再執波亞斯二攤，會喺上海上港拎到乜嘢成績喇。

--------------------
球迷一定要知！英超一哥曼城，已經登陸『BFB』！登入即送藍月球星： http://bit.ly/2AAiPDS