現年24歲嘅日本男星竹內涼真大受歡迎，今年參演多套人氣日劇及電影吸納老中青女fans，貴為搶手男星嘅佢，被雜誌《女性Seven》踢爆同22歲E cup偶像里里佳發展地下情。里里佳係女子組合「害羞急救隊JPN」成員之一，在當地可謂毫無知名度，當戀情曝光後，網民發現竹內涼真同奀星女友曾穿上情侶裝衣服及飾物，唔少男方fans都表示無法接受偶像已名草有主。

里里佳所屬事務所日前回應戀情，例牌否認拍拖，並指兩人只係普通朋友。據知二人秘密拍拖已經超過一年，對於撐枱腳及酒店過夜斷正，噚日女方所屬組合「害羞急救隊JPN」喺東京一live house開騷，吸引大批記者到場採訪，當里里佳戴口罩由幾位男性工作人員護送進場，佢以趕時間理由拒答戀情。當完騷時，里里佳撇甩隊友先行離場，已除罩嘅佢繼續封口急急腳上的士離去。