楊千嬅上個月憑《春嬌與志明》首奪香港金像獎影后，日前佢自掏腰包請台前幕後工作人員食飯，當日出席包括老公丁子高、好拍檔余文樂、彭浩翔、莊澄、王馨平、林兆霞(即係《春嬌》個Brenda)、閻汶宣同陳逸寧(《春嬌》嘅Isabel)等等。

仲記得頒獎禮當晚，千嬅封后時，興奮到喺台上唔記得多謝老拍檔余文樂，搞到佢心虛兼唔好意思，千嬅仲大笑話：「 導演話我今次死啦，得罪咗阿樂好大鑊，佢好小器0架 ﹗」席上千嬅一時技癢高歌兩曲，感染埋同場嘅王馨平及邵音音，結果歌聲引到隔離房食客睇熱鬧添。

另外，已為人母嘅千嬅，同腹大便便嘅陳逸寧喪傾兒女經；而閻汶宣仲抱埋BB去慶功宴。千嬅一見BB就即刻抱抱，母性大發，有人笑佢哋拍第三集時，可以加多個BB，樂仔聞言抵死咁話：「 證明呢部戲旺丁呀，想生仔就拍啦喂，下集唔使搵我拍，我未生仔呀 。」