論美股、中概股，資金絕對有越炒越細嘅趨勢。上期提到跟誰學6次遭沽空機構唱淡都枳唔低佢，瘋狂挾淡倉之下，周一單日爆升兩成幾。喺科技股買家話事嘅時間，只要有一定市場地位嘅科技股就有資金湧入，邊個沽空死邊個，只會助長股價挾升。中概科技股炒到癲晒，傳騰訊入股愛奇藝，執筆時後者開市前暫時嘜高三成，唔知開市後會乜嘢玩法。如果個市癲起上嚟，稍後分分鐘炒到直播平台虎牙（HUYA）、鬥魚（DOYU）（後者剛上市較少蟹貨），甚至破底嘅交友平台陌陌（MOMO）。唯一知道嘅事，就係二、三線股炒緊，但呢類三、四線股似乎未郁。

與此同時，美國二、三線科技股亦似起動，例如網站平台Shopify、商戶通訊解決方案嘅Twilio同cloud security嘅Zscaler，至於Datadog直頭係頭也不回。基本上只要未超買，熱炒板塊似乎會輪流炒作，市場氣氛理想之下，要博豐厚回報，就係喺二、三線科技股落手，買FANGMAN已屬於保守策略。中概股低市值嘅cloud同security類別有乜，剛上市金山雲（KC）、同系獵豹（CMCM）等等。市場係咪好似千禧年咁癲喪？未知，淨係知最好袋定一批備忘股份喺身，真係咁癲嘅話，咪陪吓佢癲。

晉佳

https://www.facebook.com/advanceguy1