【控球之鬼】跑步機上依然腳法了得 挪威小女將最愛曼聯
蘋果日報 2019/11/26 19:40
曼聯挪威奧脫福Vanja RolandsgardenValdres de Noruega
足球唔淨止係男人嘅世界，女仔踢波一樣可以好犀利㗎。挪威一名18歲嘅小女將雲嘉露倫加絲頓（Vanja Rolandsgarden），經常以獨特嘅方式展示自己嘅技術同控球能力，仲會喺Instagram大晒自己嘅腳法，上山下海表演一樣冇問題。今次佢就挑戰喺跑步機上面，但都係難佢唔到！
雲嘉成個IG都係自己練腳法嘅影片，就知道呢位只得18歲嘅挪威女將，有幾熱愛足球，無論行住山喺斜路、河邊嘅石頭上、停車場、海邊，甚至喺屋企撐住拐杖表演，依然冇難度。近日佢就挑戰喺跑步機上面表現腳法，轉身定係原地控波，個足球都冇離開過部跑步機。另一次，佢就嘗試喺跑步機放上色碟，模仿雪糕筒練過人技巧，一樣都難佢唔到！
雲嘉腳法了得，原來最鍾意嘅球隊就係英超曼聯。身為紅魔球迷，雲嘉當然要去到愛隊主場奧脫福球場嘅門外，表演腳法喇。現時效力挪威Valdres de Noruega嘅佢，希望成為一位出色嘅足球員，夢想仲係征戰歐聯添啊！