【李八方online】PK鄧二度暫避議員質詢 監警會報告拖至3月仍冇影
蘋果日報 2020/03/01 12:36
監警會李八方ONLINE武漢肺炎
PK鄧之前同一班藝人飯敍，提到佢去區議會「能言擅辯」，「點解我區議會講嘢咁叻呢，因為就係聽志偉《開心字典》」。
特首林鄭月娥一聲令下，公務員聽日（2日）無論有冇私家罩，都要有限度復工，而其他公共機構，都有好多彈性上班要求，至於立法會嘞喎，雖然唔少會議都照開，好以上星期五開嘅財委會會議，就通過咗包括警隊在內嘅公務員加薪建議，但亦有好多會繼續取消，其中唔少議員等咗好耐嘅保安事務委員會，第二度因為武漢肺炎押後，令警務處處長鄧炳哥，再度暫避議員質詢。
立法會保安事務委員會原定2月4日會議邀請PK鄧出席，就警方喺反修例運動中行動解畫，據聞PK鄧當時亦預備下交代投訴警察課嘅調查進展，點知武肺來勢洶洶，會議押後到3月3日再舉行。但又邊有人想到，武漢肺炎一個月後仍然咁大鑊？結果保安事務委員會主席、民建聯陳克勤最終亦決定再取消，擇日再開會，令PK鄧第二度暫避議員質詢。PK鄧之前同一班藝人飯敍，提到佢去區議會「能言擅辯」，「點解我區議會講嘢咁叻呢，因為就係聽志偉《開心字典》」，而家唔知幾時先可以再欣賞PK鄧嘅「辯才」。
外界關注監警會調查反修例運動嘅報告，原定都係2月出爐，最終3月嚟到都未見影，監警會早前講過，要等埋高院處理緊監警會權力嘅JR先公佈，換言之，唔知拖到幾時……
《果GYM》隨身播 健身壹App過！