當年今日
關於我們

懷胎四月重逾十磅 唔願郁
陳慧琳親證陀孖女

蘋果日報 2011/02/26 00:00


繼黎姿誕下孖女後,一直恨追女的陳慧琳(Kelly),昨晚出席活動時,她雀躍公佈早前人工受孕的孖胎是女嬰,可喜可賀。Kelly表示老公獲悉即將有兩名寶貝女,笑到蓮子蓉咁樣,生完孖女後,三個夠晒數,38歲的Kelly也宣佈肚皮可以收工。
已有一子劉昇的潮媽陳慧琳,一直恨生女湊成個好字,早前人工受孕成功陀孖胎,懷有4個多月身孕的她雖然深居簡出,但Kelly仍有限度接job,她昨晚挺着孖B肚在尖沙嘴出席活動,興奮向傳媒公佈懷的是孖女,終於如願以償,難怪全程笑不攏嘴。
empty
陳慧琳昨晚出席名車活動,穿上喱士短裙的她腹部微脹起,她表示懷着孖女肚子比較大,而且容易感到疲累。
着高踭靴忌跳舞
Kelly昨晚悉心打扮現身,她穿上米色喱士短裙,依然貪靚腳踏高踭短靴,她昨晚公佈懷孖女喜訊後笑不停:「唔使再生,今次陀孖女,感覺同之前好唔同,我家超過四個月,個肚好似好贅,肚好快大咗好多。」問到生完孖女後,肚皮是否可以收工,Kelly百無禁忌說:「順利生出嚟先,三個仲生咩。」安胎期間,Kelly表示會繼續接job,她說:「簡單嘅會做,錄音可以,但跳舞就咪預我。」Kelly笑言平日不穿高踭鞋,但昨晚為靚靚才冒險犯禁,所以步步為營。
Kelly大爆老公Alex也恨女,她說:「老公聽到我陀女,佢蓮子蓉咁嘅樣,好開心,我哋第一胎都想生女,龍唔龍鳳胎都冇所謂,我哋都有一個仔,生兩個女咪仲好,唔使縱壞一個。」
Kelly的長子改名劉昇(蝦餃仔),即將出世的孖女也會如胞兄一樣沿用單字,她說:「老公話單字名好型,但好難諗。」1歲多的蝦餃仔仍未知即將做哥哥,Kelly說:「佢仲細,臨生前會同佢講,不過我家多咗時間陪佢,佢好開心,老公唔畀我抱佢,我有時會攬吓佢。」
雖然距離預產期仍有數月,但Kelly已開始搜購B女的嬰兒床和奶樽等用品,可會給買孖女裝為囡囡扮靚,她說:「細個一樣樣都好得意。」
empty
貪靚潮媽陳慧琳雖然懷胎逾四個月,但仍冒險穿着高踭短靴亮相。
負荷較大容易攰
自懷孕至今,肥B唔肥媽的Kelly體重增加了約十多磅,她日前檢查時,醫生指母嬰健康,她說:「醫生話BBsize好靚,好好。」不過孖B負荷較大,令Kelly很易疲倦,非常渴睡,她接受本報電話訪問時說:「有時喺屋企沙發,挨低都唔願起身。我有時間就爭取時間瞓覺,盡量休息多啲。」始終孕婦也需要適量運動舒展筋骨,Kelly在家安胎時,也會做輕量運動,她說:「我得閒會睇住錄影帶,一邊跟住做瑜伽,簡單拉吓筋。」
Kelly為迎接盛夏出世的孖女,早前透露要騰空衣帽間改成嬰兒房,她近日坐言起行着手清衣櫃,並搬空兩個房間給孖B備用,她有意把服飾拿出來作慈善義賣,既環保又可做善事,一舉兩得。Kelly表示有待助手安排了場地,隨時有一批潮裝義賣。
陀B的Kelly還要貼身照顧蝦餃仔,可謂分身乏術,對於日前被拍到打扮娘爆外出,她笑說:「家好忙,冇時間化妝扮靚,我有時想化妝出街,蝦餃仔就好黐身,搞到冇時間化妝就出街。」
採訪:比華利、楊潔雯
攝影:黃文成
empty
陳慧琳表示蝦餃仔十分黐身,令她無暇扮靚出街,惟有多留在家中安胎。 資料圖片